بانک اشعار آئینی آذری
@bAnkesheretorki
♦♦♦♦♦♦♦
وا حسرتا آیردی اجل یاری یاریدن
زهرانی آلدی حقی گیدن شهریاریدن
ایتمیشدی چون وصیت اوزی ویردی غسلینی
دفنین ایشیت قلمده اولان انتساریدن
زهرانی تا یتوردیله قبرین کنارینه
باخدی مزاره ساقی کوثر کناریدن
توکدی عذاره گوز یاشینی یاندی آغلادی
بیر آه سرد چکدی دل داغداریدن
امر ایلدی جریده لری ایتدیلر خموش
کام آلدی شب او سرور شب زنده داریدن
شهر مدینه خلوت و خاموش و بی فروغ
عالم سکوت محض شب مرگباریدن
محبوس سینه لرده نفسلر نه وار مگر
کیم آیریلور او دامگه مستعاریدن
آغلادیلار صحابه ولی شمع تک خموش
آلمیشدی مشق گوزلری ابر بهاریدن
سلمانیدی اباذر و مقداد بولمورم
تشییع ایدن او بانوی والا تباریدن
قبرین کنارینه یتوروب قویدولار یره
افسرده دل او حادثه ناگواریدن
امر ایلدی امام که مندن کنار اولون
یوز دوندرون بو درد و غمی بی شماریدن
پیغمبرین قیزین من اوزوم قبره تاپشوروم
پیغمبری خلاص ایلیوم انتظاریدن
امر امامه ایلدی اصحاب امتثال
آیریلدیلار او محفل پر آه و زاریدن
تا بزم راز خلوت اولوب غیر قالمادی
آیریلدی صبر و تاب او شه بردباریدن
بیر قالدی نعش فاطمه بیر مرتضی علی
دریای صبری سالدی بو غم اختیاریدن
حسرتله باخدی بیر او یارالی جنازیه
آخدی سرشگی دیده گوهر نثاریدن
گوردی خزان لهیبی ایله سولدوروب گلین
ذوق و صفا غلاقه کسوب لاله زاریدن
بیر قدر درد دل دیدی بیر قدر آغلادی
اسگیلمدی شراری دل پر شراریدن
زهرانی بیر محبتیله باسدی باغرینا
هجرانه توشه اخذ ایلدی وصل یاریدن
بیرده سیخیلدی بیر بیرینه داغلی سینه لر
آیریلدی آیریلانمادی مولا فشاریدن
سسلندی قالدی فاطمه دیدار محشره
بو آیر یلیق علینی سالار اعتباریدن
ایکاش اجل گلوب منی ده راحت ایلیه
سن سیز نه خیر عالم ناپایداریدن
دنیایه باخ علی ئولومون آرزو ایدیر
فریاد گردش فلک کج مداریدن
زهرا جنازه سی نیه گیزلینجه دفن اولور
بولمنز هامی بو سری سوروش هوشیاریدن
دشمن هراسی بیر نچه مخطور ناگوار
خیبر شکن علینی سالوب اقتداریدن
مجبور اولوب بتولیدن اوز الفتین کسوب
مرگ ایتدی عندلیب گلی جور خاریدن
آغ زلفی سولان یوزونی قویدی تپراقا
تار اولدی روزگار علی شام تاریدن
فرمایش ایتدی فاطمه شرمنده ام اوزوم
مجروح سینه دن بدن زخمداریدن
بیر خواهشیم بودور که علینی گذشت ایله
چوخ دردسر یتوب سنه بو شرمساریدن
سن مندن اوتری جانیوی سالدون بلالره
چکدون او قدر رنج و اذیت شراریدن
دویدون حیاتیدن اوزیوه ایستدون اولوم
هر بیر فریضه دن صورا پروردگاریدن
گیتدون اوزون عم اوغلوی قویدون شکسته دل
هجرون قرار آلار بو دل بیقراریدن
پیغمبرین حضورینه مندن یتور سلام
عرض ارادت ایت بو ملول و فگاریدن
عرض ایله غصب اولوندی جفائیله حقیمیز
آگاه قیل او شاهی سرانجام کاریدن
هر شکوه یا گلایه آپارسان آپار ولی
هرگز آپارما اد ستم آشکاریدن
سیلی حکایتین در و دیوار صحبتین
مستور ساخلاسن او شه تاجداریدن
کشف ایتمه اسدی گلشنه باد جفای خار
بیر غنچه پرپر اولدی بیزیم شاخساریدن
اما دیسن دی من ایله دلدن سیزیلدارام
آلدیم توان و طاقتی هر رهگذاریدن
آخر ایویمده آغلاماقا مانع اولدولار
صحرانی اختیار ایلدیم اضطراریدن
تنگ ایتدیلر بو وسعتیله یر یوزون منه
کسدیم علاقه جبریله دار و دیاریدن
گلدیم حضوریوه بوله سن سرگذشتیمی
باخسان یارالی جسمیمه نیلی عذاریدن
امت رعایت ایتمدی شرط امانتی
گویا یوخیدی واهمه روز شماریدن
((خوندل)) بولار ذخیره دی فردای محشره
نه شعریدن حساب ایله نه شاهکاریدن
خوندل تبریزی
♦♦♦♦♦♦♦
بانک اشعار آئینی آذری
@bAnkesheretorki
♦♦♦♦♦♦♦
سلام،با تشکر از مهرداد نصرتی عزیز که مرا با دنیای مجازی آشنا و راهنمایی کرد،این وبلاگ صرفا جهت اشاعه فرهنگ مهدوی ایجاد شده و هیچکدام از مطالب حتی یک کلمه مربوط به اینجانب نبوده و حقیر فقط مطالب را جمع آوری نموده ام لطفا اشعار مذهبی خود را همین جا کامنت بگذارید،انشا الله که مورد قبول حضرت حق قرار بگیرد التماس دعا.